| استعملْ VPN للدخول |

هارب من المهلكه كتب: ↑

منذ 5 سنوات 

أقولها لك الآن وراح تتذكري كلامي بعدين:

أنتي راح تندمجي بسرعة في مجتمعك الجديد
معتمده على نفسك وجريئة

عقبال الحصول على الموافقة..

شككرا لك كمان على دعمك ومساعدتك لي

تيّم ♍️ كتب: ↑

منذ 5 سنوات 

اتمنى لك حياة افضل بكثير عن قبل ، بس بسألك المكتب اللي طلعلك الفيزه طلعها لك بدون مايكون بحسابك فلوس ؟

ايوى

Rebeillous كتب: ↑

منذ 5 سنوات 

الف مبروك عهد اتمنى لك مقابله سهله منتهية بالقبول

بالنسبة لكشف الحساب وتعريف العمل وقت تقديم الفيزا انا سمعت من اكثر من شخص انه اصبح غير ضروري لاستخراج الفيزا البريطانيه لسعوديين ؟ حدثيني عن تجربتك بالفيزا ارجوك .

ايوى مو ضروري سألوني قلت لهم ماعندي فوقعت لهم يسوون هم كل شي جابو لي الاوراق جاهزه

انا كتبت سؤال من اول فالمنتدى عن اللجوء ببريطانيا واني سمعت انه فاشل وفعلا كنت اظن ذا الشي لين جربته وطلع عكس التوقعات وعكس كل كلام سلبي انقال فيه

لجوئي ببريطانيا..
حتكلم عن كل صغيره وكبيره صارت معي
والعقبات اللي صارت معي فالبدايه وكتشفت بعدين انو اصلا مو عقبات بس من الخوف والرهبه كنت اشك فاي شي يصير لي وهي كانت مجرد اشيا روتينيه تنعمل حتى مع غيري
انا ماطلبت اللجوء فالمطار طلبت اللجوء بلندن بعد ثلاث ايام من وصولي
رحت لندن لاني كنت بمدينه ثانيه ومااخذت معاي فلوس الا حق الطريق فقط وهذا غلط كبير بقول ليش بالنهايه
ركبت مع تكسي وقلت لو يوصلني ل home office ووداني مبنى كبير وقالي هذا هو نزلت هناك وطلع مو نفس المبنى لان مكان طلب اللجوء بكريدون مو بلندن رحت عند الامن هناك وتعاطفو معاي جدا ودخلوني وجابو لي واحد عربي يشتغل هناك يترجم لي قلت لهم انا مفلسه ماعندي حق التكسي عشان اروح مكان ثاني قالو لي رح يتصلو ع الشرطه ويجون هم يوصلوني لان مايقدرو يسوو لي شي غير كذا.. انتظرت لين جابو لي الشرطه وكانو اربعه وجو حققو معاي وسألوني ايش عندي وايش صار لي وكذا وقلت لهم بكل شي وكانو يكتبون كلامي بعدين اخذوني معاهم ع المركز وقالو اذا ابغى اشتكي وافتح محظر وفعلا اشتكيت لهم من كل شي واعطيتهم اسماء اهلي اللي كانو يضروني وخايفه ع نفسي منهم كانو متعاطفين جدا جدا معاي اسلوبهم جدا رائع .. كانو بيودوني للhome office بس المشكله انو كان اليوم الجمعه العصر، والسبت والاحد كان ويكند فا اتصلو دبرولي سكن وحطوني فيه كانت غرفه وحمام والاكل من عند صاحب السكن قعد فيه لين يوم الاثنين الصباح..صباح الاثنين كنت مع صاحب السكن ودق جوالي رقم بريطاني وكان واحد يتكلم انقليزي مافهمته واخذه صاحب السكن وتكلم معاه وعطاه العنوان انا زعلت وكنت شاكه انو احد من اهلي مع انو طمني انو مافي شي بس ضليت شاكه فيه لانو مانفهم بعض كثير كنا نشرح لبعض على ترجمة قوقل وهي تخبص ومانفهم زين وطلعت الغرفه ودقيت ع الشرطه وجو وقلت لهم الوضع وانو انا ابغى اطلب لجوء وماني عارفه ايش اسوي واني مفلسه وكذا وبرضو تعاطفو معاي نفس اللي قبلهم وشالوني معاهم وودوني جمعيه خيريه للنساء وتكلمو معاهم وقالو لي هم رح يوصلونك للمدينه اللي فيها مكتب اللجوء..
جلست فالجمعيه وجت الحرمه اللي فيها عشان تبغى تكتب لي خطاب للهوم اوفيس وسالت عن الوضع واخذت الاوراق اللي معاي من الشرطه وخذت منها نسخ وحطتها فظرف وعطتني وقالت اعطيها لواحد مضمون من اللي بيسألوك فالهوم اوفيس ورح توصلك وحده من اللي تشتغل فالجمعيه لكريدون
وفعلا راحت معاي وحده ركبنا القطار من لندن لكريدون وصلنا الساعه 5 العصر بعد مانتهى الدوام سألتني وقتها هل اقدر استأجر بكريدون او اعرف احد هناك اجلس معاه لين الصباح اليوم الثاني وقلت لها لا واخذتني معاها ورجعنا ع الجمعيه بلندن واخذوني انا وبنت كانت معاهم برضو نفس حالتي واستأجرو لنا كل وحده غرفه وعطونا اكل لين الصباح وبعدين ودوني مره ثانيه على كريدون
دخلت ولما جاء دوري ادخل (فالتقديم ع الاعانه والسكن) وكانت حرمه اللي تسأل عطيتها الظرف اللي من الجمعيه وبعدين سالتني عن الفلوس اللي معي وقلت لها اني مفلسه قالت لي انها ماصدقتني لانو طلع لها فالفيزا حقتي اني داخله بريطانيا ومعاي مبلغ كبير قلت لها اني سويت الفيزا بمكتب سياحي مااعرف عن ولو كان عندي المبلغ ماكنت مع الشرطه من يوم الجمعه لين اليوم قالت لي مهما كان انا مابصدقك وباين انو هذي كلها حجج وانتي رح تنتظري لين اخر اليوم على الفاضي وبعدين رح ينرفض طلبك فا انصحك توفرين على نفسك الوقت وتطلعين تدورين لك سكن( لاتخافو من كلامهم مثلي لانو كلام روتيني عشان بس يتأكدون اذا فعلا انتي حتتشردي ومامعاك سكن ) نفس هذي اللي تسأل على قد ماكرهتها طلعت برى وشافتني ابكي بالصاله وجت عندي وطبطبت علي وعطتني مويه وقالت لي اني رح اصير تمام..
جا وقت المقابله المبدأيه دخلوني الغرفه انا كنت مرتبكه ومتوتره لاني ماحسبت حساب انها رح تصير بنفس اليوم
كان المحقق ينرفز وحتى مايخليني اتكلم واخلص كلامي كان يقولي خلاص اختصر ولا اعيد الكلام انو عندو ناس غيري تنتظر تنرفزت منه بس بالاخر طلع معه حق لانو ذي مش المقابله الاساسيه وانا ماصدقت حد سألني ماقدرو يسكتوني‍♀️
قالي انتي كذابه وكل هذا تاخذينها حجج والا حياتك لو كانت بخطر كنتي طلبتي اللجوء فالمطار وقاللي انتي اكيد دخلتي الدوله بطريقه غير شرعيه وهذا يعرضك للاعتقال وكلام كثير زي كذا خوفني وقتها لدرجة غير طبيعيه لاني ماكنت اعرف انها اشياء روتينيه حتى من الاسئله قاللي هل تمانعين اذا قلت بحطك فمعتقل للاجئين؟بما انك مشرده قلت لو لا عادي ماامانع اذا كان مكان امن ماعندي مشكله
طلعت من عندو وانا خائبه وفاقده الامل انو رح يعطوني سكن
بعدها بساعه يمكن نادوني وعطوني نسخه من المقابله وقالو لي انو تمت الموافقه على اعطائك سكن واعانه طول فترة اللجوء وقالي الحين رح نحطك بفندق مدة ثلاث ايام وبعدين تروحي ع الملجأ وطلعونا انا وناس ثانين كانو هناك وحطونا فالفندق ويعطونا اكل وشرب وكذا وبعد ثلاث ايام نقلونا بباص الى الملجأ..
الملجأ كنت حاطه اسوء الاحتمالات فيه انصدمت فعلا لما وصلت كانت احلى ايام حياتي الايام اللي عشتها فالملجأ قعد فيه ٣ اسابيع كان مكان نظييييف وجديد معاك غرفه خاصه الحمامات والمطبخ مشترك مع خمس بنات غيرك كان في مطبخ كبير واربع حمامات اثنين للاستحمام واثنين عاديين وكانو ملزمين علينا بالنظافه يعني كان جدا نظيف
وكان برضو المبنى كلو بنات بس يعني حاطين مبنى للبنات لحالهم والشباب لحالهم والعوائل لحالهم
اذكر لما وصلت الملجأ وشفت البوابه الكبيره جا فبالي انو المعتقل اللي قالي المحقق عنه بس طلعت البوابه عشان الامان بس يعني الملجأ جدا امن والكاميرات بكل مكان وقالو لي انتي حره بالطلعه والخرجه والتعارف ومافي اي وقت محدد لطلوعك ورجوعك يعني بختصار انتي حره
الاعانة كانو يعطونا فاليوم 5 باوند جدا قليله ماحتكفيك الا اكل وشرب يعني لازم تقدري ترتبي وضعك فيها وتدوري السوبرات الرخيصه
كان برضو في كنيسه يوم فالاسبوع تساعد اللاجئين بالاكل يعني تروحين لهم ويعطوك اكل ومعلبات وفواكه وخضار وو...
بعدها جتني الموافقه ع السكن الدائم يعني السكن اللي تبقين فيه لين يعطوك الموافقه او الرفض حق قضيتك
نقلوني من الملجأ ورحت السكن وقالو لي في بنتين بيشاركوك فالسكن
برضو عطوني بطاقة صراف حتنزل فيها الاعانه كل يوم اثنين يعني بدل مااستلم 5 باوند يوميا خلوها تصير 37 باوند اسبوعيا وبكذا انا شفتها احسن واوفر
السكن اول ماوصلت كان وصصصخ لدرجة غير طبيعيه عشان البنات الزق اللي فيه يعني اخذ مني جهد ثلاث ايام وانا امسح وانظف لان فعلا كان عفن اعيش راحة بال الحين والبيت بعد ماتنظف صار يجنن وهادي والبنات مايقعدو فيه اصلا بس يجون يشوفون البريد اللي وصلهم ويطلعو
بعد ماتنقلي من الملجأ تبدأي تدوري لك محامي يعطوك ورقه فيها ارقام وايميلات محامين من المدينه اللي انتي فيها وانتي بكيفك تختارين منها او لا
وبس هذي انا انتظر المقابله الاساسيه
انا تعبت نفسي يعني لو طلبت اللجوء بالمطار كان وفر علي وقت وجهد او لو عرفت اروح لكريدون ع طول كان برضو وفر علي بس انا كان وضعي غير لانو بعض من اهلي كانو فبريطانيا فكنت خايفه منهم ومارتبت الوضع تمام
هذي تجربتي وبقولكم ايش استنتجت منها
(انا قريت موضوع برى المنتدى هذا يحذر من طلب اللجوء فبريطانيا لانها سيئة ويخلونك تتشرد فالشوارع وخرابيط ثانيه انا كنت خاااايفه جدا من بريطانيا بس ماكان عندي خيار ثاني لاسباب شخصيه ماقدرت احط لي وجهه ثانيه غيرها، طلع الموضوع كلو غلط بغلط والله ماتشرد ولا قابلت اي عنصريه ولا اي صعوبه انا منجلطه ومصدومه لاني جيت وانا حاطه اسوء الاحتمالات اللي ممكن تصير لاي انسان وتوقعت اني بنام بالشوارع وبتشرد واتقطع انا اللي تعبني فقط هو الخوف اللي جيت وانا شايلتو خوف من الدوله ومن الوحده ومن الاهل والسفاره، تعاااامل جدا رائع حتى الشرطه كانو يقولون لي لاتخافي المملكه المتحده مابترجعك وانتي بهذا الوضع رح تحميك وماافي احد رح يقدر يوصلك ومن جد محد قدر يوصلي تواصلي مع اهلي صار بمزاجي متى مابغيت اشيل البلوك وطقطقت عليهم وبعدين اسوي بلوك.. الشي الثاني الفلوس لاتروحي لل home office وماعندك مبلغ لو صغير حق يوم يومين انا رحت وماعندي هلله عشان كنت خايفه يرجعوني وهو غلط هم مش مسؤولين عن جوعك لين يوصلونك الملجأ يعني لو كان معي ٢٠ باوند او ١٠ باوند بس ماحيقولو لي شي بس انا عشان المواضيع اللي قريتها وخوفتني وكمان مايفتشوك حتى لو معاك الف باوند وقلتي لهم ماعندك شي ماحيفتشوك انصدمت من ذا الشي كنت متوقعه حتى جوالي رح يفتشوه فعلا اكتشفت ان المواضيع حق اللجوء تسوي رهبه وخوف غير طبيعي يوم عشت التجربه كنت كل يوم انتظر اليوم الاسود اللي كنت حاطته فبالي والعكس كان يصير كل يوم يصير احسن من اللي قبله)
وعلى فكره اللي من اهلي وكانو ببريطانيا بلغو علي عند الشرطه عن هروبي واختفائي وانقلبت عليهم تعرضو لممرمطه وتحقيقات وتفتيش البيت وسؤال الاطفال عن معاملتهم وحمولهم المسؤوليه بما اني هربت فااكيد اني تعرضت لشي منهم ورفضو يعلمونم بمكاني قالو هي بالغه ومالكم حق تعرفو مكانها اذا هي ماترضى..يعني زي ماقلت محد يقدر يوصلك اذا انتي ماعلمتي عن مكانك.
(مااعرف شي عن اللجوء بالمطار اذا فيه تفتيش او لا تكلمت عن اللجوء من داخل الدوله)
ماكنت ابغى اكتب هذا الموضوع الا بعد مااخلص من المقابله الاساسيه عشان اكتب كل التجربه
مادري اذا نسيت شي واي سؤال حجاوب عليه