سبع محاولات لخطة الترانزيت - السابعة نجحت! قصة فتاة سعودية وصلت إلى هولندا بدون تأشيرة

ماذا تفعل عندما تعلق في بلد قبل وصولك إلى بلد اللجوء

كاتب الموضوع
كفاح
مشاركات في هذا الموضوع: 1
مشاركات: 1
اشترك في: منذ 2 سنوات
كسبت: Locked

سبع محاولات لخطة الترانزيت - السابعة نجحت! قصة فتاة سعودية وصلت إلى هولندا بدون تأشيرة

1#

مشاركة بواسطة كفاح » منذ 2 سنوات

(بالأحمر إضافات الأدمن)


هاي انا ناجيه من الناجين اللي طلعو من السعوديه بقولكم قصتي بكل اختصار واتمنى م احد يصير له نفس اللي صار معي واتمنى ماحد يفكر يهرب الا ومعها فلوس عشان لو صاره نفس اللي صار معي يقدر يتصرف
ونبدا بقصتنا
انا كنت فتاه مثل اي فتاه سعوديه ماعنده لاحقوق ولا اي شي انسانه فارغه تمام كنت مختلفه عن مجتمعي اختلاف كبير جدا كنت ارفض الظلم ولا ارضى فيه
ماعلينا من تفاصيل قصتي بقولكم شصار معي قبل اوصل لبلد اللجوء
اول شي بديت ابحث وادرس الموضوع مليون الف مره واقرا عن الصعوبات وش ممكن يصير معي عرفت ان اهم نقطه هي المال جمعت مبلغ جدا حلو بفتره قصيره وبعدها اشتغلت ع الملابس والاغراض وكان هذا اغبى قرار اتخذه لو جمعت الفلوس حقات الملابس افضل لي المهم شريت كل اللي بخاطري جوال جديد ولابتوب وسماعات بلاستيشن لاحد يسال ليش شريته بس كنت بطلع بـ اكثر الاشياء ثمن المهم بديت خطه كيف اطلع الشناط كانت شنطتين بس وحده تنشحن ووحده صغيره طبعا م اخفيكم كم مره رتبت شنطتي فوق ١٠ الف مره ورميت ملابس كثيره كنت جدا متوتره من موضوع الشنط واول فكره جت براسي احجز فندق صغير اي كلام ورخيص واحط شناطي فيه وكانت فيه فكره ثانيه ان صديق لي يساعدني واحد شناطي عنده بس صار بينا خلاف عشان كذا انتبهو تثقون ب احد حتى اقرب صديقه لك لا تدري عنك خططي لحالك نصيحه المهم كان باقي ع رحلتي يومين وانا م طلعت شناطي المهم مادري وش صار ذاك اليوم واهلي قررو يطلعو يتمشون هذي كانت فرصتي قلت لا ماقدر اطلع تعبانه واول م طلعو من هنا لبست عباتي وطلبت اوبر وطلعت شناطي بالحوش وفتحت بوكنق وحجزت لي اقرب فندق واسرع من السريع اكيد الحجز وطلعت وجيتهم عادي المهم اني اخذت فندق نزلت شناطي ورجعت للبيت ومددت خليته يومين هنا يبدا الحماس يوم الرحله طبعا انا كنت اداوم العصر كيف تداومين وهربي انتي اهلك معطينك حق الشغل سالفه الشغل سالفه طويله م عليكم منها المهم والمكان اللي انا فيه م فيه مطار دولي اطريت اني احجز من مدينتي لمدينه ثانيه لمدينه ثانيه لان وقتها م كان فيه دايركت المهم وكانت خطت رحلتي من السعوديه (الدمام) - امستردام- اوكرانيا (كييف) لما وقلت كان باقي ع رحلتي اربع ساعات استاجرت فندق رخيص قمت تروشت ولبست وكشخت عشان يشوفوني يقولون بنت نعمه المهم ورحت للمطار اقص البوردنق
قالو لي م نقدر نركبك لان لازم فيزا قلت اوكرانيا م تطلب فيزا قالو لا لازم شنغن قلت انا ماني رايحه لدوله شنغن انت عليك من وجهتي الاخيره قال لا لازم فيزا قلت قصدك فيزا عبور (ترانزيت) اطلعها الحين قال لا لازم فيزا شنغن (يكذبون لأن مسار الرحلة لا يتطلب تأشيرة شنغن و لا تأشيرة أوكرانيا) قلت طيب - م كنت بجادله عشان عارفه فيه رحله بكره بعد مابي يسبب لي مشكله قلت طيب ابي استرجع التذكره انت منعتني قال تكلمي مع الخطوط قلت طيب
اول محاول لي فشلت تمام لازم اسوي تصرف سريع طلعت ورحت رجعت للفندق المهم اهلي ساعه اربع الفجر صارو يرسلون ويدقون عرفو اني م رجعت وفيه شي صار المهم اني حطيت حجتي ان ام صديقتي توفت والبنت بالعنايه وكنت ابكي او اسوي نفسي ابكي وكنت مشغله وراي قران عشان يصدقوني وكذا المهم مشت الكذبه بس قالو لازم ترجعين قلت طيب برجع المهم اهلي كنت اصرفهم اني عندها ولا اقدر اجيكم الحين
المحاوله الثانيه (نفس مسار الرحلة السابقة)

رحت للمطار كان فيه هندي قال لازم فيزا قلت م يحتاج ووضحت له اني رايحه سياحه وابي اروح كل الناس راحت قال لازم فيزا قلت م يحتاج نشبت له شوي وبعدين قال دقيقه كلم بالجوال وقال ارسلت اسمك لسفاره للهولنديه انتظر ردهم وكان الرد لا
طبعا كان فيه سعودين ع جنب وسالتهم شفه هذا علي واطقطق واسولف معهم طلعت قبلي فيه بنت م كملت ع اوكرانيا يعني سوت لجوء
وصار وقتها اني م اقدر اجلس بالسعوديه واهلي ازعجوني ارجعي والا بنجي بيت البنت كان لازم تصرف سريع دورت رحلات م حصلت شي وطلبت اوبر ورحت للبحرين -طبعا اوبر بالدمام يوديك لين مطار البحرين عادي بس انتي وحظك اذا محصن او لا واذا مو محصن ينزلك عند الحدود وفيه هناك كدادين كثار ياخذونك بمبلغ انا اخذو مني ٣٠٠ هنا نعرف فايده الفلوس -
المهم وطلعت للبحرين واموري زي الحلاوه ودورت اقرب رحله نفس خطتي م لقيت شي طبعا بالبحرين ماني امنه حجزت من البحرين لتركيا
وكان افشل قراري اني اخترت تركيا بس عشانها كانت دوله امنه
حاولت اربع محاولات بتركيا
اول وحده من تركيا (اسطنبول) - امستردام- تايلند (قالوا لا بد من تأشيرة هولندا ثم قالوا تايلند مقفلة بسبب الكورونا (و فعلا تايلند مقفلة بسبب الكورونا))
والثانيه تركيا (اسطنبول) - أمستردام- السعوديه (فأعطوها ختم الخروج ثم انتبه الموظف الهولندي أنها هي نفسها التي حاولت قبل يومين على رحلة تايلند فاستدعاها و منعها من صعود الطائرة)
والثالثه نفس الثانيه
وكلها م طلعت فيها
وغيرت المطار ونفس الخطه من تركيا (مطار صبيحة اسطنبول) - امستردام - السعوديه (فقالوا لها "عندك مشكلة بالجواز" فمنعوها من صعود الطائرة)
ولا نجحت هنا ولا تذكره كانت مسترجعه انا بديت اطفر والطيران الاوربي غالي جدا غالي ي بنات بشكل م تتخيلونه لازم ميزانيه معكم جلست بتركيا شهر طبعا وكله كنت احاول
المهم وبعدها طلعت لاوكرانيا ع الخطوط الاوكرانيه دايركت وجلست فيها فتره حلوه وبعدها حجزت من كييف- امستردام- السعوديه
وفادتي وقتها ان الطيران الامارتي اغلقوه والانتظار كان ساعتين بس بمطار امستردام وطبعا وقتها كنت لابسه الحجاب كامل مو طالع مني شعره وحاطه الكمام يعني اني راجعه لسعوديه ولانيتي شي م دففو بس دفعت حق العبور للمطار الترانزيت ومشت الامور طيبه وركبت الطياره وكنت خايفه شوي خايفه يرجعوني ع رحله السعوديه وكنت خايفه يكون فيه شرطي عند باب الطياره يدقق برحلات وكذا و (في مطار أمستردام) انتظرت لين تفضى الطياره م طلع بوجهي احد مشيت وجلست بالحمام شوي وكنت افكر اقطع جوازي عشان م يرجعوني لاني كنت فاده الامل بس م قطعت جوازي ولاشي كانت الامور عاديه والمطار هادي شوي وقلت خلاص لازم اسلم نفسي خلاص ورحت اسال وين الشرطه ابي الشرطه ونزلت تحت لشرطه وقلت لهم ابي لجوء وانا مره خايفه وجلست ابكي عندهم وكذا قالو لا تخافين ولاتقلقين انتي بأمن هنا وارتحت واخذو جوازي واخذو جوالي باذن مني عادي ناخذه قلت ايه واخذوه وجلست شوي لين روقت وجو يسالوني كم شنطه معك قلت شنطتين وجابوها لي وبعدين بدو يسالون اساله خفيفه لطيفه وبعدها نزلوني تحت بقسم المطار وجلست بقسم المطار يمكن ٥ ساعات وقت طويل شوي بس كان فيه كل شي اكل وماء وقهوه وشاهي وبلاش بعد المهم بعدها بصموني واسالوني كم سؤال ورحت للكامب المغلق كامب المطار طبعا فيه كل شي يعطونك اكل وماء وحليب ومناشف وعده النظافه كامله بكامب المطار كنت لحالي م معي احد جلست بالكامب بس ١١ يوم وبعدها رحت للكامب المفتوح ولاني لحالي حطوني مع بنت مؤقت لين يطلع لي بيت
بس ي بنات مو كل القصص وحده لازم قصتك تكون جيده وتكونين متحدثه كويسه وتشرحين بكل وضوح وتكونين عارفه بالقانون مو تقولين مادري م اعرف بيدرون ان م عندك سالفه ولازم تشرحين زين اكتبي بورقه وقلم قصتك والتفاصيل مع الادله والادله مو شي مهم تقدرين تقولين م كنت اقدر اصور وقتها ومن قصتك تطلعين وش ممكن يسالونك حطي كل شي براسك والنصيحه الاهم تفادو رحلات الترانزيت نصيحه من قلب لانها وهقتني الا اذا م فيه حل الا هي ولازم معكم مبلغ مالي كويس انا جلست شهرين لين وصلت امستردام ولو مامعي فلوس مادري وش ممكن يصير معي ولو م ساعدني صديقي كان ممكن م وصلت وباقيه بدون ولاشي ولا حتى مكان امن انام فيه انتبهو وخططو زين وحطو كل الاحتمالات لاني كنت متوقعه اطلع بكل سلاله واذا طلعت قبلك بنت مو معناتها بتطلعين مثلها مو كل الحظوظ سوء انتبهو وبس هذا اخر شي وحاولو مره ومرتين ومليون لا تياسوا
واتنمى للجميع حياه سعيده وجميله :heart: .


(بعد 10 أيام من طلب اللجوء صدر القرار بالموافقة على لجوئها. حصلت على إقامة 5 سنوات، ثم بعد ذلك تم نقلها إلى ملجأ آخر خارج المطار بانتظار أن يجدوا شقة لها ثم يبدأ صرف راتب اللاجئ لها حسب النظام في هولندا). لكن هناك فتيات سعوديات وصلن بعدها لمطار أمستردام بخطة الترانزيت و لم يحصلن على اللجوء خلال أسبوعين بل فقط تم إخراجهن خلال أسبوعين من ملجأ المطار إلى الملجأ المفتوح و هن بانتظار صدور القرار.


الخطة التي طبقتها كفاح نسميها "خطة الترانزيت بدون تأشيرة".

ملاحظة: كلمة "عبور" تُسمى بالإنجليزي "ترانزيت".

خطة الترانزيت بدون تأشيرة: هي أن تشتري تذكرة مثلا الدمام-أمستردام-كييف بدون أن يكون معك تأشيرة هولندا، ثم تصعد الطائرة في الدمام ثم عندما تنزل الطائرة في أمستردام تطلب اللجوء في مطار أمستردام (هولندا).

ملاحظة: تأشيرة هولندا تُسمى "تأشيرة شنغن" لأنها تسمح لك بدخول كل دول منطقة شنغن.

التذكرة تكون كالتالي:
بلد الانطلاق-بلد الترانزيت-بلد الوجهة النهائية.
مثلا: السعودية-هولندا-أوكرانيا.
أو: أوكرانيا-هولندا-السعودية.

ملاحظة: عندما نقول "بلد الوجهة النهائية" فإننا نقصد الوجهة النهائية المذكورة في التذكرة. فأنت تتظاهر بأنك مسافر إلى بلد الوجهة النهائية، لكنك في الواقع تخفي نية طلب اللجوء في بلد الترانزيت. فالبائع الذي يبيعك التذكرة و كذلك موظفو المطار و موظفو شركة الطيران لا يعلمون بأنك تنوي طلب اللجوء في بلد الترانزيت، و لو علموا أو شكوا مجرد شك فسوف يتم منعك من صعود الطائرة.

و كما تقرأ أعلاه فإن خطة الترانزيت غير مضمونة حيث أنهم إذا شكوا أنك تنوي اللجوء فإنهم يمنعونك من صعود الطائرة. فدائما احسب حسابك أنك يمكن أن تتعرض للمنع من صعود الطائرة.

لو أنت مصر على تطبيق خطة الترانزيت فلا بد أن يكون معك مبلغ كبير لخطة الترانزيت يكفي لعشرين محاولة عدا عن مصاريف الفندق و المواصلات و الطعام و التنقل بين البلدان. و أن يكون جوازك صالحا لمدة طويلة مثلا سنتين.


انقر هنا للقراءة عن محاولات الوصول لبلد اللجوء ترانزيت بدون تأشيرة


لكي تنجح خطة الترانزيت بدون تأشيرة فلا بد مما يلي:

1- أن تكون جنسيتك معفية من تأشيرة الترانزيت. انقر هنا لمعرفة هل تأشيرة الترانزيت إلزامية أم أنك معفي منها.

2- أن تستوفي الشروط مثل شراء تذكرة إياب و غير ذلك. عليك أن تتأكد من الشروط قبل أن تطبق خطة الترانزيت.

3- ألّا يشكوا في أنك تنوي طلب اللجوء ببلد الترانزيت.
السبب الأول للشك هو جنسيتك. فمثلا، لو كنت من الإمارات أو الكويت أو قطر فاحتمال نجاح خطة الترانزيت مرتفع. أما لو كنت من السعودية فاحتمال نجاح خطة الترانزيت أصبح أقل من 50%. و لو كنت من الجنسيات العربية الضعيفة اقتصاديا كالأردن و مصر فاحتمال نجاح خطة الترانزيت ضئيل. و لو كنت من الجنسيات العربية الضعيفة جدا مثل اليمن و الصومال و السودان فاحتمال نجاح خطة الترانزيت ضئيل جدا.
هناك أسباب أخرى للشك مثل سلوكك و إجاباتك عندما يسألونك عن سبب السفر و خط سير الرحلة هل هو مقنع أم لا. لا نستطيع أن نحصي جميع الأسباب. كذلك هناك نسبة من الحظ في نجاح خطة الترانزيت.




الموجودون الآن

المستخدمون الذين يتصفحون المنتدى الآن: لا يوجد أعضاء مسجلين متصلين و 25 زائراً