اللهم لا سهل الا ماجعلته سهل وانت تجعل الحزن ان شئت سهل
اللهم اني قد كتبت هذي الرسالة واعلم في نفسي اني يوما من الايام سأخرج من السعودية فيسرها لي كما يسرتها لصحابة رسولك عندما هاجرو الى الحبشة حينا ضيقت عليهم في دينهم ودنياهم من قريش وبعد .....
كتبت هذي العبارات من ضيق في نفسي اعيشه ولكن كلي امل بالله ان بعد كل عسر يسر في البداية :
كل بلاد العالم اليوم حين يولد الطفل لديهم يهتمون فيه بدايتها في اعطائه الجنسية ومن ثم الاهتمام فيه الى ان يموت انا هنا اتحدث عن الدول الاسكندنافية والدول التي لديها سقف الاهتمام بالانسان عالي على سبيل المثال كندا :
الطفل لديهم اول مايولد داخل حدودهم البرية والجوية والبحرية يعطونه اول حق من حقوقه وهي الجنسية بعد ذلك يصرف له مبلغ لوالديه لرعايته الصحية ايضا لشراء له احتياجاته الاشياء الاساسية من الغذاء والدواء حتى ملابسه والعابه وهذي المعلومة اخذتها من شخص يعيش في كندا وايضا الرئيس الكندي غرد بها في تويتر يقول جاستن تروودو :الأمهات والاباء--هذا اليوم! يحصل الطفل الكندي علي أعانه أكثر سخاء ، ويرتفع مع تكلفه المعيشة من الآن فصاعدا. وهذا يعني المزيد من المال في جيبك ، معفاه من الضرائب.
اه كل ماشوف هذا الاهتمام بمواطنيهم بل اهتمامهم وصل حتى للاجئين اقول في نفسي ليتني ماتولدت في السعودية .
نكمل اليوم مواليد السعودية وانا من ضمنهم من يوم ما اتولدت وانا مقهور في هذي الحياة ومن الاضهادات التي مريت بها سواءا وانا صغير بالمدرسة لمن يدخل عليا المدير وانا صغير ويتكلم امام الطلبة (الاجانب الي يسمعو اسمائهم يوقفوا ويكمل لازم تجدد الاقامة ولا ماتخش المدرسة !!) ماعلينا
كنت اقول دائما كلمة اجانب ليش تطلق علي وانا دايما اروح للمدرسة في الطابور الصباحي اردد النشيد الوطني اتكلم لغة عربية مثل غيري عاداتي مثل غير من الطلبة ليش كل هذي العنصرية اسف ولكنها عنصرية مريت بها وانا صغير . نكمل .....
تخرجت من الثانوية و بدأت الجامعة تعال شوف هنا كمية الغبن وكمية القهر الي امر فيه مستقبلي كله ضاع (الاجانب مايدخلو الجامعات ) اخ كل يوم اقول ليش يارب ليش هذا كله اش ذنبي اني اتولدت في السعودية ليش في كل مرحلة تجيني عقبة ولا استطيع المرور منها الى ان بدأت افكار تقول ماعليك من الجامعة ابحث عن عمل والجامعة مو كل شي .
بدأت ابحث عن عمل حتى وجدت عمل مناسب اشتغلت فيه قرابة سنة حتى اتت عقبة جديدة قرار منع عمل الاجانب وسعودة الوظائف انا هنا تيقنت اني ولدت في بقعة من الجحيم بل الجحيم ذاته ليش كل هذي الانظمة الاستبدادية وانظمة ليس لها اي فائدة لا تخدم الوطن ولا تخدم اقتصاد الوطن ولا تخدم اي شي في الوطن قضيتنا تكلم فيها شيوخ وعلماء و مفكرين واساتذة جامعات بل انه تكلم فيها حتى الاعلامين كل اطياف المجتمع تكلم عنها لكن بدون فائدة ارجع اقول يارب ليش ؟ انت ماقصرت معاهم اعطيتهم كل شي
اساس الحياة يستكثروه علينا ليش ؟!!
في كل شي الامور تتقفل في وجهي
يقول واحد من الجنسية العربية لاجى في دولة : مواليد السعودية انتم اليوم مالكم الا الدعاء لانكم في جحيم !! لا وظيفة ولا علاج ولاجامعة ولا اقامة دائمة وفوق هذا تدفعون ضرايب ٤٠٠كل شهر على الشخص الواحد وتعال شوف افراد العايلة
هنا قلت ياليت لو عندي مصباح سحري اغير قدري
مرة اجتمع كبار الحي الي عندناوكلهم سعوديين وقالوا لازم نكلم الشيخ الفلاني وهذا الشيخ جدا طيب وهو واصل في الحكومة ومعروف جدا قالوا له ليش ماتكلم الملك عن اوضاع مواليد السعودية وقتها كان الملك عبدالله قال طيب بعد فترة سألوه قالو له ايش صار في الموضوع قال :ماجاني رد!!!
اليوم في مواقع التواصل الاجتماعي نشمت ونسب ونهان على حد قولهم(نحن الي خربنا البلد وسرقنا امول البلد وخربنا العادات والتقاليد ونحن خونة ودخلاء على هذا الوطن ) والله التريليونات معروف من اكلهاولا خربنا ولا فعلنا طبعا اكثرهم الذباب
وبعضهم جهل وعنصرية المشكلة بعضهم كبار واساتذة جامعات ومفكرين آه آه
كل ماتخش السعودية في ازمة اقتصادية حطو علىينا نحن الضعاف
والاغنياء والتجار والامراء مايمسهم شيئ
والله شي مخزي وعار
......انتهى .......
كلمني واحد قالي اطلب لجوء الى كندا قلت من زمان انا افكر لكن في عقبتين في طريقي / ١- كيف اروح لكندا وما عندي وظيفة والسفارة الكندية تطلب تعريف من جهة العمل
٢- يطلبون مني كشف حساب بنكي ومبلغ وقدره انا ماعندي مبلغ يعني مافي سفر !
ياليت لو تفيدوني في هذي النقطتين لو بروح مثلا سياحة اوقدم لجوء هناك
والله تايه ماني عارف ايش اسوي بس ودي اخرج من السعودية ودي اخرج